👦🏻：早晨！
👵🏻：唔該我想回收！
（默默從買餸車仔拎出一車教科書）
👵🏻：呀孫開學，舊嗰啲唔要，我咪攞嚟回收囉。
👦🏻：咁新淨嘅？！嘩仲要有啲係完全冇寫過！點解唔攞去書局度賣呀？
👵🏻：可以賣到錢嘅咩？
👦🏻：梗係得啦！每本起碼都賣十幾廿蚊啦！呢本未開過嘅五六十蚊都得呀！
👵🏻：嘩！你早啲喺呢度返工就好喇細佬！咁我呢啲攞去賣喇。
🧠
買賣二手教科書係我哋每年一度都會見到嘅風景，每逢暑假旺角街頭、葵廣或者屋邨文具店都會搖身一變成為書屋，行行下街都會有人收購兜售二手書，如果有人攔截問「買唔買書」更係年輕嘅象徵（都可能有人以為問你買唔買俾仔女？），但係對老人家來講就可能聞所未聞。
不過係綠在工作咁耐，暫時都只有👵🏻 嘗試過帶教科書過嚟回收。唔知係大家都知道教科書都有二手市場並非只是廢紙，定係大家寧願扔都唔回收呢？
同一疊紙張，佢係「有轉售價值嘅書」定係「廢紙」，其實係出自唔同嘅市場價值嘅判斷。好似係綠在回收紙，每斤係10分，以前要15斤先有包印尼撈麵或鹽，500斤先有50蚊超市禮券。依家換咗去「易賞錢」就要10斤先得50「易賞錢」，即約$1，大為貶價。如果拎去回收舖當廢紙賣，可能都有約 $0.4 至$0.8一斤。而拎去書局就可能賣到$5至$30，點睇都係拎去書局博一博最著數。
本教科書值幾錢？觀乎本書有冇畫花？到底教科書有冇改版？捉唔捉到「季節性市場」喺邊度出現？邊間書局會願意以高啲嘅價錢回收？ 要賣到好價錢都要做足功課先得，鬥智鬥力，如果唔係都可能最終變成廢紙。
由👵🏻拎書嚟回收，我回想其實我係綠在區區出現之前已經有豐富嘅回收經驗，原來回收其實離我哋好近。例如我細個都有幫屋企人搬啲報紙雜誌落樓下回收貨車度賣，甚至我買電子遊戲卡帶時其實都會上二手平台度搵有冇人放售，有時可以8折甚至更平買到心頭好，證明二手都有好嘢！依家綠在係方便咗大家，但如果可以加強同現有嘅社區回收或二手資源做更好整合咁就相得益彰喇。
