👋🏼👵🏻雙手輕微顫抖的老婆婆
👦🏻我
👦🏻：早晨！
👋🏼👵🏻：唔該我想回收，我用（實體積分）卡架！
。。。一輪回收後。。。
👦🏻：婆婆呀，要唔要將張卡啲積分轉落綠綠賞個app度呀？
👋🏼👵🏻：唔轉住啦，我呢啲電人家都唔識用電子嘢嘅
👦🏻：咁好啦，你記住4月1號張卡就唔用得㗎喇，到時再換啦，到時連啲實體禮品都冇得換㗎喇！
👋🏼👵🏻：咩話？幾月幾號呀？
👦🏻：(張開喉嚨、放慢語速)4～月～1～號～呀～
👋🏼👵🏻：咁呀嗰啲禮品冇得換，咁啲分點算呀？
👦🏻：喺個app度換易賞錢囉，你當係電子超市現金券啦
👋🏼👵🏻：又係咩嚟㗎？唉我哋呢啲老人家又眼矇又冇用，識鬼用咩，唉～遲啲再算啦……
🧠
環保署以「科技進步」為由宣布「綠綠賞」電子積分計劃即將全面電子化，今年4月起回收者唔可以再用實體積分卡儲分同換實體禮品。我理解環保署嘅用意係想減省人力同物流開支，但佢哋又有冇企喺回收者嘅角度思考呢？
據環保署2025年7月數字，全港約 106 萬「綠綠賞」用戶中，有 87％用戶都係用手機應用程式（註2），確實係用app嘅回收者比較多。但無論用卡定用app，啲街坊都好興嚟到回收嘅時候順便問埋「有冇米/油呀？」。環保署數據都引證咗呢個事實，由2024年12月至2025年5月間，回收者用於兌換實體禮品嘅積分比「易賞錢」加埋「Carbon Wallet」都多。而直至2025年5月，回收者用於兌換受歡迎實體禮品嘅積分係兌換「易賞錢」加埋「Carbon Wallet」22倍！（*註3）可見街坊習慣都係回收或者經過6仔時順便用積分換禮品，換到米、油⋯、廁紙就好。恐怕全面電子化後佢哋都要重新適應、亦要一段時間摸熟點樣喺app入面將啲綠綠賞積分轉做易賞錢積分。要轉做Carbon Wallet、或者捐啲分俾慈善團體嘅選擇，操作上就更加複雜，預計都未必有咁多人會換了。
制定環保回收政策時，唔單止要考慮成本或者係提升科技配套，而應該考慮市民嘅生活習慣同適應科技水平。綠在多數回收者年紀較大，好難話轉就轉。雖然智能電話愈來愈普及，但唔代表全港市民都識使用智能電話。例如好多長者嘅智能電話只係用嚟打出打入，最多用埋whatsapp同親朋溝通。早年都有本地研究話「（長者）本身識字不多，對一些概念的掌握相對困難，再加上隨年紀增長出現的視力、聽力及腦退化，要適應新科技，遇上困難也在所難免」（註4）。站在綠在工作人員角度而言，我認為「全面電子化」推行操之過急，並未切合用家使用習慣。就筆者觀察所得，撇除堅實前線回收者（即每日光顧一次或以上嘅熟客）之外，多數年長嘅回收者就算成日嚟，但都仍然需要唔同程度上嘅協助，輕則提醒佢哋點操作秤重機；重則因為佢哋甚至係唔識字，需要我哋佢操作成個儲分程序。一部份年長嘅回收者雖然已經裝咗App，但入到嚟6仔都係叫我哋教佢打開個QR code。用「綠綠賞」兌換「易賞錢」並唔只係「㩒幾個制」咁簡單。回收者要每次要記得app內兌換嘅步驟，換好咗分，要用時又要去指定商店個app度「左㩒又㩒」先可以「積分當錢駛」。若然積分兌換全面電子化，又會有幾多長者被科技拒之門外呢？前線工作人員係咪又要身兼科技大使嘅角色？
對比以往直接用「綠綠賞」積分換實體禮品複雜多幾步，亦都冇咗綠在便利點嘅「便利」。對佢哋嚟講唔單止係提高咗兌換獎賞嘅門檻，而係要佢哋重新建立生活習慣，對比起建立新習慣，可能番番去「唔回收」嘅舊習慣更方便。政策一刀切改變獎賞方式實在會影響回收者嘅動力，與其分階段執行，點解唔保留多幾個唔同渠道俾人揀呢？
推行環保政策改革前，政府應優先考慮用家嘅習慣同感受，先知道新政策嘅可行性，如果唔係就會重蹈垃圾徵費覆轍，引起反彈。當主要嘅回收者都係退休長者、低收入基層老人嘅時候，要時刻記住佢哋嘅科技適應能力係比成長於手機世代嘅GenZ唔同，要佢哋全部只能用電話儲分同換禮品顯然係會將佢哋推走，呢個又係咪環保署樂見嘅發展呢？
*註1：👵🏻同教科書👵🏻唔係同一個人
*註2： <「綠綠賞」電子積分計劃全面電子化>，2025年7月25日，新聞公報
*註3：附件，<「綠綠賞」電子積分計劃全面電子化>，2025年7月25日，新聞公報
*註4: <長者不適應 缺乏支援 港樂齡科技 潛力難開拓>，2023年11月6日，明報
