文/現在回收中
｜大嶼小聚｜
最近，我同一班關心明日大嶼「擱置」嘅朋友有一場「大嶼小聚」，一來認識一下東大嶼都會、明日大嶼、南大嶼生態走廊等政府嘗試推行嘅發展計劃；二來回顧十年嚟民間對於以上發展大計嘅回應；三來，同一班志同道合嘅人聚一聚。
聚會中，嶼聯代表簡述一路以嚟嘅發展進程：《香港機場核心計劃》、《東大嶼都會》、「香港2030+」、「土地大辯論」、《交椅洲人工島》等，亦分析咗政府以「提高土地儲備」、「推動香港經濟發展」云云嘅論述作為開發大嶼嘅原因。隨後，我哋順發展時序講到地政署、規劃署及環保署等唔同政府部門監管責任同執法漏洞點樣導致現今具生態價值嘅濕地受到不可逆嘅人為破壞，變成石屎地或洗車場。睇住一幅幅貝澳、十塱、水口嘅土地被石屎、水泥板覆蓋嘅情況唔單止令大家無奈，亦令我哋痛心。痛心大嶼山俾自私嘅商人同發展商搞到滿目瘡痍。
慶幸嘅係，我哋擁有彼此，喺環境保護嘅路上，民間團體可以話係屢敗屢戰、屢戰屢敗。「明日大嶼」係停咗，但係「生態旅遊」、「南大嶼生態走廊」等未有充足討議嘅計劃已經如箭在弦。我哋喺聚會上分享到自己對大嶼山以及北部都會區未來嘅諗法，有人表達擔憂、有人表達無奈。喺公民社會萎縮嘅時代，大家都為無法為自己家園發聲嘅水牛同候鳥憂心。然而，會上亦有「積極小子」認為「生態旅遊」概念同定義喺普羅大眾眼中尚未定型，所以愛護環境、珍惜生態嘅大家可以嘗試企喺平衡保育同發展嘅角度向大眾解釋「生態旅遊」應有嘅模式，提倡「先設立保育生態框架，再發展旅遊產業，而唔係當生態係一隻金雞、然後不停逼佢生蛋」。無論政府係當香港嘅郊野環境只係推高GDP嘅一次性消耗品，抑或以為生態環境係自有永有而唔需要謹慎地看管同護理嘅資產，呢啲諗法都會加劇香港生態環境嘅浩劫。無論依家有幾多空間，只要有危機就會有民間團體同環團嘅戲份。
｜圍爐之必要｜
作為一個中學畢業年先開始關心社會嘅青年，呢次大嶼小聚對我嚟講係上世代嘅聚會。誠如一位參加者所言：「依家年輕一代就係睇住北部都會區發展，我哋呢啲上一代嘅就係見證住成個明日大嶼由無到有、再到依家擱置。以前啲嘢仲係會有公開諮詢、地區參與、甚至立法會會拉布拖延，幾經轉折拖到依家2025集合天時地利先煞停到明日大嶼。反觀北都係高速推進、甚至乎政府特意為佢設立個新框架，所以依家民間參與部份幾乎歸零。不過，適逢今天明日大嶼算係暫告一段落，確實係好值得總結一吓十幾年嚟我哋見證過、嘗試過嘅嘢，再一齊諗吓條路點行。」望著分享嘅內容，就好似係上咗一堂香港土地運動歷史咁，見到當年有搞民間論壇、登島拉橫額反對填海等唔同嘅方法去嘗試撼動主旋律……令我覺得「這麽近、那麽遠」，畢竟社運黃金年代已成歷史，而我已經錯過咗，百般滋味在心頭。
我有時會反思，參與呢啲「圍爐」活動有咩用呢？聚會中，我哋唔單只互相分享最新資訊、或者吸收唔同參與者嘅觀點與角度，我哋仲會感知到「原來有人同我一樣咁唔開心」。分享係保育環境路上嘅感受，當我哋無奈、乏力嘅時候，我哋會記得「仲有好多人同我一樣關心呢片土地」。畢竟我哋係有血有肉嘅人類，間中圍爐，人心先會暖。我相信喺倡議嘅路上，仍有一份好强大而純粹嘅力量，you will never walk alone，共勉之。
